Drukarnik™ вылучае b-варыянты і пазабазавае.
Ці дапушчальна правяраць ТСБМ-1984 па правілах-2010?

 цёплы, -ая, -ае.
  1. Які змяшчае ў сабе пэўную колькасць цяпла; сярэдні паміж гарачым і халодным. Цёплая вада. Цёплае паветра. Цёплае малако. ▪ Дзякуй цёплым дажджам і халоднай расе за жыты, што ўзраслі ў небывалай красе. ← Артур Вольскі. Шурпатая кара дрэва была цёплай, пахучай. ← Міхась Лынькоў. У хаце прыемна пахла цёплым хлебам і напаленай печкай. ← Іван Мележ. // Які з'яўляецца крыніцай цяпла. Цёплая печ. ▪ Ты закурыш пры цёплым дарожным агні І пачуеш у сэрцы шчаслівы спакой. ← Кастусь Кірэенка. // Які вызначаецца цяплом, уласцівым жывому арганізму. Людзі.. беглі, уцякалі ў пушчу. Схапіўшы .. сваю сонную, цёплую Верачку, — паляцела і Ліда. ← Янка Брыль. // Які мае адносна высокую тэмпературу паветра. Дзень быў ціхі, ясны, цёплы, нават гарачы. ← Якуб Колас. Вясна выдалася дружнай і цёплай. ← Міхась Лынькоў. // З высокай сярэднегадавой тэмпературай. Цёплыя краіны. Цёплы клімат. ▪ Застаўся Іліко жыць у цёплым горадзе Поці. ← Эдуард Самуйлёнак.
  2. Які добра засцерагае ад холаду; добра сагравае. Цёплае адзенне. Цёплая коўдра. ▪ На плечы .. [маці] была накінута цёплая хустка. ← Уладзімір Шахавец. // Які добра захоўвае цяпло. Я знайшоў цёплае гняздо для пакалечанай ластаўкі. ← Змітрок Бядуля. Уцякала Бандароўна У поле з цёплай хаты. ← Янка Купала. // Які ацяпляецца, абаграецца; уцеплены (пра памяшканне). Цёплая палавіна хаты. Цёплы хлеў.
  3. пераноснае значэнне Які вызначаецца душэўнай цеплынёй; ласкавы, добразычлівы; сардэчны. — Я люблю дзяцей, — з цёплай, пяшчотна задуменнай усмешкай кажа Іра. ← Вісарыён Гарбук. // Прасякнуты добрымі пачуццямі да каго-н. Можа, ніхто так не сумуе па цёплым слове з дому, як салдат. ← Янка Скрыган. // Які складаецца з блізка знаёмых людзей; прасякнуты сардэчнымі, душэўнымі адносінамі. Марына Паўлаўна і Саша вячэралі ў цёплым кругу чужой і такой блізкай з гэтага вечара ім сям'і. ← Алена Васілевіч. І ў цёплым сяброўстве За гэтым сталом Раскрыем душу Для ўваходу Вялікага слаўнага Новага года І чаркі напоўнім Віном. ← Мікола Хведаровіч.
  4. пераноснае значэнне Мяккі, прыемны для зроку, слыху. Цёплая музыка. ▪ І здаровае, крамянае надвор'е, і яркія цёплыя фарбы маглі б толькі радаваць і бадзёрыць нашых хадакоў. ← Алесь Якімовіч. // Пра чырвона-карычневы тон спектра ў процілегласць сіне-блакітнаму. Цёплы тон пейзажу.
  •••
  Цёплае месца гл. месца.
  Цёплая кампанія гл. кампанія¹.