Drukarnik™ вылучае b-варыянты і пазабазавае.
Ці дапушчальна правяраць ТСБМ-1984 па правілах-2010?

 пасеяць, -сею, -сееш, -сее; закончанае трыванне, што.
  1. Рассыпаючы, укінуць зерне, насенне ў зямлю для вырошчвання. У суботу зранку выехала [Зося] з бацькам пасеяць грэчку. ← Цішка Гартны. Тут мяркуецца пасеяць травы і стварыць культурную пашу. ← Ігнат Дуброўскі. // Засеяць зернем, насеннем. — Мы раім людзям прыязджаць лепш увесну, насупраць цяпла. Адразу можна пасеяць лапік які пшаніцы і мець свой хлеб. ← Алесь Пальчэўскі. // спецыяльны тэрмін Змясціць мікраарганізмы ў пажыўнае асяроддзе для размнажэння.
  2. пераноснае значэнне Выклікаць, узбудзіць у кім-н. якое-н. пачуццё, перажыванне. Язэпу трэба было ісці. Але неяк цяжка было зрабіць першы крок, асабліва цяпер, калі гэты доўгі, цыбаты чалавек пасеяў у душы трывогу... ← Алесь Асіпенка. Алесь разгубіўся. Макар Сяргеевіч не тое, што пераканаў яго, а пасеяў сумненні. ← Уладзімір Шыцік.
  3. пераноснае значэнне размоўнае слова Згубіць. Хаця б.. Валынец шапку дзе па дарозе не пасеяў? ← Мікола Лобан.
  4. размоўнае слова Пачаць ісці, сеяць (пра дробны дождж, снег).