Drukarnik™ вылучае b-варыянты і пазабазавае.
Ці дапушчальна правяраць ТСБМ-1984 па правілах-2010?

 разгледзець, -джу, -дзіш, -дзіць і разглядзець, -джу, -дзіш, -дзіць; закончанае трыванне, каго-што.
  1. Уважліва, пільна агледзець каго-, што-н. Пасажыраў у вагоне было нямнога, і Лабановіч пераходзіў ад аднаго акна да другога, каб разгледзець гэтую мясцовасць і хоць прыблізна адгадаць, дзе яго новая школа. ← Якуб Колас. Добра разгледзеў Толя ўсю красу раніцы позняй восені толькі за горадам. ← Алесь Якімовіч. Вечарам Шура з Сяргеем вылезлі на бераг, разглядзелі мішэнь. ← Іван Навуменка. // Пільна ўглядаючыся, заўважыць, убачыць, распазнаць каго-, што-н. Асенняя ноч была такая цёмная і над ракой павіс такі густы туман, што твары людзей ніяк нельга было разглядзець. ← Аляксей Кулакоўскі. Спыніліся [мужчыны] і ў тумане разгледзелі хату. ← Алесь Пальчэўскі. // пераноснае значэнне Прыгледзеўшыся, заўважыць, разабрацца ў кім-, чым-н. [Якаў:] — Дарэмна ты так падумаў. Людзі ёсць, толькі іх разгледзець трэба. ← Аркадзь Чарнышэвіч. Булая папракалі, але злёгку, а больш хвалілі. За смеласць, за ўменне разгледзець новае, своечасова падхапіць, выпеставаць. ← Уладзімір Шыцік.
  2. Разабраць, абмеркаваць (звычайна з мэтай ацэнкі або прыняцця рашэння). Разгледзець справу ў судзе. ▪ З надыходам заакіянскай восені на парадку дня Генеральнай Асамблеі ўсё менш застаецца пытанняў, якія трэба разгледзець. ← Мікола Філімонаў. Вярнулася .. [Кавалёва] пад вечар, пакуль разгледзела пошту дома, то ўжо сонца паспела апусціцца за лес. ← Ігнат Дуброўскі. [Малюга:] — У мяне тут яшчэ многа заяў, і мы павінны іх разглядзець. ← Янка Скрыган.