Drukarnik™ вылучае b-варыянты і пазабазавае.
Ці дапушчальна правяраць ТСБМ-1984 па правілах-2010?

 дыханне, -я, ніякі род
  1. Працэс паглынання кіслароду і выдзялення вуглекіслаты жывымі арганізмамі; газаабмен. // Убіранне і выпусканне паветра лёгкімі. Бацька заснуў. Дыханне яго было слабое, але роўнае і спакойнае. ← Аркадзь Чарнышэвіч. // Шум, які ўтвараецца пры дыханні. [Соня] мільганула пад акном, ускочыла ў сенцы, і я ўжо чую яе паскоранае бегам дыханне. ← Мікола Ракітны. // Паветра, якое выходзіць з лёгкіх пры выдыху. Лоб быў сцюдзёны, і Алег пакрыў яго далонню, а потым пачаў хукаць, грэць сваім дыханнем. ← Якуб Ермаловіч.
  2. пераноснае значэнне Подых, павёў, праяўленне чаго-н. Дыханне жыцця. Дыханне часу. ▪ Дзень пачынаўся без хмурынкі на небе, без дыхання вецярка. ← Іван Шамякін. Недзе далёка чулася дыханне вялікага горада: шум машын, званкі трамваяў. ← Уладзімір Шыцік. // Набліжэнне, наступленне чаго-н. Чуецца дыханне восені. ▪ Ужо чутно вільготнае дыханне хмары, ужо навакол разліты прыемны водар азону. ← Мікола Гамолка.
  •••
  Штучнае дыханне — сістэма прыёмаў для аднаўлення натуральнага дыхання, якое часова спынілася.
  Другое дыханне — аб новых сілах, аб прыліве энергіі, бадзёрасці ў каго-н. пасля перыяду стамлення, апатыі, няўдачы.
  Дыханне заняло (захапіла, перахапіла) гл. заняць.
  Дыханне занялося — стала цяжка дыхаць, спынілася дыханне (ад бегу, работы і пад.). У душы ў .. [Шуры] пахаладзела, дыханне занялося, спёрла, нібы хто сціснуў горла. ← Алесь Ставер.
  Затаіць дыханне гл. затаіць.
  Перавесці дыханне гл. перавесці.