Drukarnik™ вылучае b-варыянты і пазабазавае.
Ці дапушчальна правяраць ТСБМ-1984 па правілах-2010?

 насупраць і насупроць, прыслоўе і прыназ.
  1. прыслоўе На процілеглым баку; прама перад кім-, чым-н. У хаце, пад вялікай рамкай з фотакартачкамі, стаяў стол, засланы белым, з зубчастымі карункамі па краях абрусам.. Насупраць, у кутку — печ з мноствам пячурак. ← Іван Сіняўскі. У двор каля ліпы пажылы чалавек уводзіў з пашы каня, з двара насупроць выганялі парасят. ← Іван Мележ. — Стой! Адкуль ты і хто ты? — Стаў насупраць патруль. ← Антон Бялевіч.
  2. прыслоўе размоўнае слова Наперакор; нязгодна з кім-, чым-н. Гаварыць насупраць. Рабіць насупраць.
  3. прыназоўнік з Родны склон і (радзей) з Давальны склон. Ужываецца для выражэння прасторавых адносін: указвае на прадмет або асобу, перад якімі на процілеглым баку што-н. размяшчаецца. Насупраць нашага дома працякае невялічкі ручай. ← Рыгор Ігнаценка. Нарэшце дарога скончылася. Вось і школа і воласць насупроць яе. ← Якуб Колас. // Ужываецца пры ўказанні на прадмет або асобу, якія перамяшчаюцца насустрач руху каго-, чаго-н. І я пайшоў насупраць плыні, Каб дакапацца, дзе клубок. ← Максім Лужанін. Ляцеў бы ветру насупроць Раздоллем цешыўся бялёсым. ← Сцяпан Гаўрусёў.
  4. прыназоўнік з Родны склон. Ужываецца для выражэння ўступальных адносін: указвае на прадмет, асобу, з'яву або працэс, наперакор якім што-н. робіцца, адбываецца. Хіба ж я пайду насупраць волі бацькі? ▪ Цямра[в]ая сіла свету старога Сплятаецца ў чорны клубок, Адна ў яе думка, мэта, дарога — Паўстаць насупроць жыцця маладога, Спыніць наш вясенні паток. ← Якуб Колас.
  5. прыназоўнік з Родны склон. Ужываецца для выражэння часавых адносін: указвае на тэрмін, адрэзак часу, перад якім што-н. існуе, адбываецца ці павінна адбыцца. [Мікалайчык:] Ну, дзед, шчасліва! Глядзі, каб усё расклеіў, Ды асцярожна — насупраць дня ідзеш. ← Алесь Кучар.
  6. прыназоўнік з Родны склон. размоўнае слова Ужываецца для выражэння параўнальных адносін: указвае на асобу ці прадмет, з якімі што-н. параўноўваецца. Ладымер насупроць Сымона зусім шчуплы і худы. ← Кузьма Чорны.