Drukarnik™ вылучае b-варыянты і пазабазавае.
Ці дапушчальна правяраць ТСБМ-1984 па правілах-2010?

 скрозь, прыслоўе і прыназоўнік
  1. прыслоўе Усюды, кругом. Тут скрозь зелянелі садкі і агародчыкі з ярка-чырвонымі ружамі і пахучымі гваздзікамі. ← Алесь Якімовіч. Увосень скрозь пахлі смалой новыя сцены. ← Кузьма Чорны.
  2. прыслоўе размоўнае слова Заўсёды, праз увесь час. [Віктар] скрозь прыглядаўся да .. [Зеленюка], сачыў за кожным ягоным рухам. ← Міхась Зарэцкі. [Касцюкевіч:] — Я сябе скрозь сам правяраю — у мяне ўсё запісана. ← Янка Скрыган.
  3. прыназоўнік з Вінавальны склон. Праз, цераз што-н. Скрозь галіны дрэў скупа прабіваўся тужлівы бляск месяца. ← Якуб Колас. Скрозь сівую сетку дажджу я ўгледзеў у полі, ля куста вербалозу, жанчыну... ← Барыс Сачанка. // Ужываецца пры абазначэнні якой-н. з'явы, стану і пад., за якімі можна заўважыць што-н. [Андрыян] даганяе .. [Юльку] і крычыць скрозь гул матора і ляскат жалеза: — Сядай, падвязу! ← Аркадзь Марціновіч. Скрозь гэты хор [конікаў] Андрэй пачуў угары лёгкі посвіст. ← Ігнат Дуброўскі. Як скрозь сон пачуў гэты крык Міколка. ← Міхась Лынькоў.
  4. прыназоўнік з Вінавальны склон. Ужываецца пры абазначэнні дзеяння, стану і пад., якое змяняецца, чаргуецца, суправаджаецца іншым дзеяннем, станам і пад. — Я хачу, каб калгас... — скрозь кашаль гаварыў [Лаўрэн], — каб жыў калгас. ← Сымон Баранавых. — Рабі што хочаш, а я не астануся адна, — скрозь слёзы гаварыла Таня. ← Іван Новікаў. — Гэта ж Сямён! — чуе Маша скрозь дрымоту свой голас і прачынаецца. ← Іван Мележ.
  •••
  Гатоў скрозь зямлю праваліцца гл. гатовы.
  Глядзець скрозь пальцы на каго-што — тое, што і глядзець праз пальцы на каго-што (гл. глядзець).
  Праваліцца мне скрозь зямлю гл. праваліцца.
  Скрозь зубы — тое, што і праз зубы (гл. зуб).
  Як скрозь зямлю праваліўся гл. праваліцца.
  Скрозь зямлю бачыць — тое, што і бачыць пад зямлёю (гл. бачыць).