Drukarnik™ вылучае b-варыянты і пазабазавае.
Ці дапушчальна правяраць ТСБМ-1984 па правілах-2010?

 парадак, -дку, мужчынскі род
  1. Правільная, наладжаная сістэма размяшчэння чаго-н.; належны стан чаго-н. Прывесці ў парадак кватэру. ▪ Ля хаты Кліма Мінчонка поўны парадак, тут не ўбачыш нічога лішняга, непатрэбнага. ← Павел Кавалёў. [Вера і Канькоў] абышлі кашару, агледзелі бітоны, вёдры, саламарэзку. Усюды чысціня, парадак. ← Алесь Асіпенка. // у знач. выказнік размоўнае слова Правільна, добра; як належыць. Першае звяно эскадрыллі Мохарта праверыла работу матораў. Парадак! ← Антон Алешка.
  2. Устаноўлены лад, план, сістэма кіравання. Знішчэнне капіталізму, увядзенне асноў камуністычнага парадку стала асноўным зместам сацыяльнага прагрэсу. ← газета «Звязда».
  3. Расклад, распарадак; спосаб. Шмат.. суседзяў .. [Пніцкага] таксама, як і ён, уцягваліся ў новы парадак жыцця, адрываючыся ад старога. ← Кузьма Чорны. // Звычай. Маладая сама хадзіла да суседзяў — такі ўжо вядзецца здаўна ў беларускіх вёсках парадак, — запрашала да сябе на вяселле. ← Алена Васілевіч. Насуперак заведзенаму парадку, прыгнечаны Максім Сцяпанавіч не паехаў адразу на дачу, а папрасіў Федзю збочыць спачатку дамоў. ← Уладзімір Карпаў. // Правілы паводзін, якія склаліся дзе-н., закон. А за сталом маўчком сядзелі. Там хлопцы гыркацца не смелі, Бо там парадак вельмі строгі, Там падпілуюць табе рогі, Калі парушыш дысцыпліну. ← Якуб Колас.
  4. Пэўная паслядоўнасць, устаноўлены ход чаго-н., чарговасць. Алфавітны парадак. ▪ На адным участку прыдумалі, як змяніць парадак паступлення дэталяў на лінію. ← Уладзімір Шыцік. Віктар Сяргеевіч падышоў да хлопцаў і расказаў ім аб парадку работы: першая група спачатку пойдзе церабіць кусты і ачышчаць рабочую пляцоўку, другая, услед за ёй, будзе знімаць верхні здзірванелы пласт, трэцяя — глыбей урывацца ў грунт. ← Алесь Якімовіч.
  5. Спосаб, метад, правілы ажыццяўлення чаго-н. Парадак аплаты працы. ▪ [Важатая], расказала аб парадку прыёму ў піянеры і, урэшце, прадыктавала тэкст урачыстага абяцання. ← Алесь Якімовіч.
  6. звычайна ў Родны склон. Разнавіднасць, род, тып чаго-н. Пытанні агульнага парадку.
  7. Вайсковае пастраенне, строй. І танк наляцеў на парадкі пяхоты; крычалі ад жаху зялёныя роты. ← Анатоль Вялюгін. Асобныя групы, калі маглі, прасочваліся праз баявыя парадкі карнікаў, і наносілі ім удары з тылу. ← Рыгор Няхай.
  8. Група блізкароднасных сямей у сістэматыцы жывёл і раслін.
  •••
  Парадак дня — пералік пытанняў, якія разглядаюцца ў пэўнай чарговасці на пасяджэнні, сходзе і пад.
  Для парадку — а) для падтрымання, навядзення парадку; б) для захавання прынятых правіл, фармальнасцей.
  Навесці (свае) парадкі гл. навесці.
  Сваім парадкам — так, як заўсёды, як звычайна.
  Такім парадкам — гэтак, так; такім чынам.
  У адміністрацыйным парадку — паводле распараджэння органаў выканаўчай улады.
  У рабочым парадку — у працэсе работы.
  Усё ў парадку — а) у добрым стане, у спраўным выглядзе. [Механік:] — Не заводзіцца [машына]. Праверылі яе, здаецца, усё ў парадку, а вось капрызіць. ← Уладзімір Мяжэвіч; б) добра. — Ну як, Пятровіч, справы? — звярнуўся ён з парога яшчэ. — Ды ўсё ў парадку, Сцяпан Іванавіч. ← Алесь Пальчэўскі.