Drukarnik™ вылучае b-варыянты і пазабазавае.
Ці дапушчальна правяраць ТСБМ-1984 па правілах-2010?

 фігура, -ы, жаночы род
  1. Форма, абрысы чаго-н. Ды дарожкі ўсе ў парадку І праведзены пад шнур, Гожы клумбачкі і градкі Розных выглядаў-фігур. ← Якуб Колас. // Форма, малюнак, узор, утвораныя пэўным размяшчэннем прадметаў. Вычварныя фігуры кустоў і дрэў. Мазаікавыя фігуры.
  2. Склад цела, знешнія абрысы, формы чалавека. — Узмужнеў, узмужнеў, — сказаў Булай, задаволена аглядваючы моцную фігуру Алеся. ← Уладзімір Шыцік. Уся.. фігура [Арлоўскага] вызначалася сярод партызан строгай афіцэрскай выпраўкай. ← Міхась Машара. Ва ўяўленні [Юркі] паўставаў Лёдзін вобраз — ..з тых, што трапляюць у песню, стройная фігура, якая нечакана і раптам аформілася. ← Уладзімір Карпаў. // Пра чалавека якога-н. выгляду, якой-н. знешнасці. Уся ўвага цяпер пераключана на фігуру запыленага чалавека, чый узмах рукі выклікаў такую небывалую весялосць, такое радаснае захапленне. ← Н. Перкін. // размоўнае слова Прыгожы склад цела. [Юля] раней ганарылася сваёй фігурай. ← Іван Грамовіч.
  3. Чалавек (звычайна невядомы, незнаёмы ці кепска бачны). Ля абгарэлага пня, скурчыўшыся, сядзелі цёмныя фігуры... ← Янка Маўр. Падымаю галаву і бачу чужую, незнаёмую фігуру. ← Янка Скрыган. Нібы з зямлі выраслі непадалёку тры чалавечыя фігуры. ← Міхась Чарот. З боку цёмнай грамадзіны-капліцы падсоўваецца белая здань. Ціха ідзе гэта таемная фігура, як бы плыве. ← Змітрок Бядуля. // размоўнае слова пагардлівае Чалавек, тып. Ідзе — сунецца фігура, Азіраецца панура, Каб ёй хто не перашкодзіў. ← Якуб Колас. // Чалавек як носьбіт якіх-н. якасцей, уласцівасцей. Буйная палітычная фігура. ▪ Як тут яшчэ раз не ўспомніць светлую фігуру Анатолія Фёдаравіча Коні, яго сумленныя і мужныя паводзіны на працэсе Веры Засуліч! ← Уладзімір Мехаў. // Важная асоба, персона. Леў цяжкую пагрузку нёс: Начальнік як-ніяк, фігура немалая. ← Уладзімір Корбан. [Надзя:] — Захар Пятровіч усё-такі значная фігура ў інстытуце, і справу з ім табе прыдзецца мець яшчэ не аднойчы. ← Уладзімір Шахавец.
  4. Постаць чалавека або жывёлы ў скульптуры, жывапісе. А там з боку дарогі вынырнуў незвычайны фантан з пачварнымі скульптурнымі фігурамі і мудрагелістай лепкай. ← Барыс Стральцоў. На каменных плітах высечаны рэльефныя фігуры людзей — партрэты пахаваных. ← Віталі Вольскі. // Вобраз, персанаж твораў мастацкай літаратуры або тэатральных спектакляў. Галоўная фігура твора [«Лявон Бушмар»] — уладальнік хутара.. Бушмар. ← М. Луфераў. «Чалавек з масы»., становіцца цэнтральнай фігурай у літаратурных творах. ← Алесь Адамовіч.
  5. Комплекс рухаў пры выкананні чаго-н. (танца, пры катанні на каньках і пад.). Першая фігура кадрылі. ▪ Група хлапчукоў смела кружылася вакол шырокай палонкі, выпісваючы такія адмысловыя фігуры, што Максім ажно пазайздросціў. ← Іван Шамякін. // Палёт самалёта з рознымі паваротамі, віражамі. Фігура вышэйшага пілатажу.
  6. спецыяльны тэрмін Меладычны або рытмічны элемент, які ўскладняе і ўпрыгожвае музычны твор. Аркестравыя фігуры. Рытмічная фігура характэрна для маршавага руху.
  7. У геаметрыі — частка плоскасці, абмежаваная замкнутай лініяй, а таксама наогул сукупнасць размешчаных пэўным чынам пунктаў, ліній, паверхней і цел. Геаметрычныя фігуры.
  8. У шахматах — кароль, ферзь, ладдзя, слон і конь. Хапаю яе [шахматную дошку], кладу на табурэт, пачынаю расстаўляць фігуры. ← Хведар Жычка.
  9. Старшая ігральная карта (туз, кароль, дама, валет).
  10. Моўны зварот, стылістычны прыём, які надае мове асаблівую выразнасць. Цэзуры, паўзы і іншыя рытмічныя фігуры робяць разнастайнай рытміку вершаў Багушэвіча. ← Міхась Ларчанка.
  11. спецыяльны тэрмін Чарцёж, схема, рысунак, якія змяшчаюцца ў тэксце кнігі.
   [Лац. figura — вобраз, форма.]